« Fräiwellechwëllandu? » as eng Campagne am Kader vum europäesche Joer vum Benevolat fir de fräiwëllegen Asaz vu Jonken an der Gesellschaft z'encouragéieren.
Et ginn eng Hellewull Organisatiounen an Initiativen di drop ugewise sinn datt jonk Leit op fräiwëlleger Basis bei hinne matschaffen. D’Campagne « Fräiwellechwëllandu? » versicht engersäits jonk Leit ze motivéiere sech z'engagéieren an well anerersäits de Benevolat am allgemenge promovéieren.
Zu enger Zäit an där den Individualismus zum héchste Gutt erklärt gëtt a wou déi nei Medien eis zu engem parallele Liewen an enger ëmmer méi virtueller Welt alueden, ass a bleift de Bénévolat eng vun de wichtegsten Aufgaben.
Dass een en Deel vun senger Fräizäit opfert an där ee sech fir anerer asetzt, ass eng Erfahrung déi net z'ersätzen ass an erlaabt eis de Matenaner, deen zu dëser Zäit vill ze vill vernoléissegt gëtt, erëm ze stäerken.
Zu Lëtzebuerg engagéieren sech dausende vu Leit als Bénévole an enger oder méi Organisatiounen. Laut dem Luc Pauly vun der Agence vum Bénévolat sinn eng ronn 3.300 Associatiounen zu Lëtzebuerg registréiert, an déi meescht vun hinnen si frou wa Leit, déi ouni Selbstzweck hëllefe wëllen, sech bei hinnen engagéieren.
De Flavio, d'Lauridania, d'Lisa, d'Maysan, de Patrick an de Steven si just e puer Beispiller vu Jonken déi sech als Fräiwelleg engagéieren. Nieft dem Gefill eppes areecht ze hunn, hunn dës Jonk op sozialem Plang och verstan, dass des Aart a Weis sech anzesätzen eng Beräicherung vun hierem Liewen duerstellt.
Laurent Moyse
D’Lëtzebuerger Guiden a Scouten ass eng dynmaesch Organisatioun déi iwwert ganzt Joer Aktivitéite, wéi zum Beispill Sortien an d’ Natur, vir Kanner a Jugendlecher ubitt. Den Héichpunkt am Joer ass de Camp am In- oder Ausland.
Mir siche jonk Leit déi sech wëllen engagéieren, déi bereet si fir Verantwortung an engem vun den 58 lokale Gruppen als Chef ze iwwerhuelen, an sou nei Frënn ze fannen.
Doniewent ginn et och nach Méiglechkeeten an engem Grupp als Mataarbechter ze hëllefen oder och um Verbandsniveau matzeschaffen.
Du bass interesséiert ? Bei eis kriss du eng Formatioun an deenen wichtege Beräicher déi’s de brauchs wann s du mat Kanner a Jugendleche schaffs ewéi, Secherheet, Animatiounstechniken, oder d' Guide- a Scoutsmethoden mat hiren Techniken.
Selbstverständlech gëss de gutt encadréiert vu forméierten a kompetente Leit.
D’FNEL ass en nationale Scoutsverband de schonn zanter senger Grënnung am Joer 1914 mat benevole Jugendleche schafft.
Bei eis kanns du um lokalen Niveau direkt an de verschiddene Scoutsgruppe matwierken. D’Aufgabeberäicher aus deenen's de wiele kanns si ganz villfälteg : Programm an Aktivitéiten ausschaffen, Formatioun fir zukënfteg Chefen organiséieren, Gestioun vu Material, Entretien a Gestioun vu Scoutshomer, Webmaster, Trésorier, Secrétaire, Redaktioun vu Scoutszeitungen, Gestioun Scoutshop, Conseiller juridique, Conseiller médical, Entwécklungshëllef (ONGD), international Kontakter.
An du kriss natierlech och eng zolidd Formatioun an du bass natierlech optimal encadréiert vun den „alen“ Scouten di dier zur Säit stinn.
Wëlls de aktiv ginn bei eis? Da kontaktéier eis nach haut!
LISEL as eng Plaz wou Studente sech kennen treffen an austauschen iwwert sozial an humanitär Themen. Mier hëllefen hinnen och a de verschiddenste Liewenslagen Äntwerten op hier Froen ze fannen a stinn hinne mat Rot an Dot zur Säit wann et zum Beispill drëm geet eng Studentewunneg ze fannen, ee Job oder d'Land kennen ze léiere wou se lo wunnen. Doriwwer eraus bidde mir Sproochecoursen un, mier hëllefen CV’en ze schreiwen oder ganz einfach di sozial a politesch Strukture kennen ze léieren. Mier si frou iwwert jidder Student dee Loscht huet eis bei dësen Aktivitéiten mat ze machen. Mell dech bei eis a komm laanscht kucke wie mir sinn a wat mir man.
Young Caritas ass bei der Caritas de Jugendprogramm fir Bénévolat am soziale Secteur. Mir schaffen zanter 1 Joer mat ronn 100 bénévole Jugendlechen, déi sech fir verschidde Projeten engagéieren. Jidderee kann do esou vill Zäit mat dran erabréngen, wéi hie wëll. Mir organiséiere vill Projeten, ginn awer am léifste vun den Ideeë vun de Jonken aus. Wat wëlls du genee man? Zäit verbréngen mat behënnerte Matmënschen oder eelere Leit eng Freed maachen? Komm bei eis laanscht, mier hunn eng Bourse aux idées, dat heescht e grousse Sammelsurium un Iddien a Projete wou s du kanns aktiv ginn a fannen esou ganz bestëmmt fir jiddereen dat, wat ëm Spaass mécht. Mir hëllefen dir och genee dat ze fanne wat dier Spaass mécht an dech op deng nei Aufgabe virzebereeden.
Mir sinn d’Lëtzebuerger Jugendpompljeeën an ons get et séit 1965. Zanterhier schaffe mir mat Jugendlechen an haut sinn eng ronn 1.500 Jugendlecher, Jongen a Meedecher, bei eis aktiv. Och eng 300 Erwuesener sin a verschiddene Funktiounen : Jugendleeder, Member vum Landes- a Kantonalkomitee a nach vill méi aktiv.Mir sichen jonk Leit die Loscht hun sech ze engagéiren an an enger flotter Equippe matzeschaffen. Du bass interesséiert? Bei eis kritt all aktive Jonken eng zolidd Grondausbildung, am Läsch- an Rettungswiesen, an nach weider ganz spezifesch Formatiounen. Encadréiert gëss de bei eis vun erfahrenen Jugendleeder mat hire Chef de Corps. Ausserdeem kriss de och d’Méiglechkeet am In-, mä och am Ausland un Aktivitéiten deelzehuelen.
Mier sinn e jonken an dynamesche Grupp deen seng eegen Radiossendungen realiséiert um Radio ARA. Mier schaffen zanter 10 Joer mat ronn 50 jonken Benevolen pro Joer. Bei eis kanns du deng eegen Radiossendung produzéieren, mä Jonker sinn natierlech och ëmmer méi wie wëllkomm an onsem Comité.All Jonken deen bereet ass bei eis matzeschaffen kritt eng Formatioun am Beräich Radio an 2 Educatricen stinn där mat Rot an Dot zur Säit.
D’Lëtzebuerger Landjugend - Jongbaueren a Jongwënzer regroupéiert 7 regionale Gruppen, déi autonom fonctionnéieren: Cliärref, Furen, Dikkrich, Maacher, Süden, Uewersauer an Zenter. Si kënnen esou ganz flexibel op déi spezifesch Situatiounen an hire Regioune reagéieren. D’Aktivitéite si villfälteg, a jee no Grupp kanns du am Komitee matschaffen oder hëllefen, fir eng vun de sëllechen Aktivitéiten ze organiséieren: Theater, Baler, Autoball, Landjugenddag, Foire agricole - an nach ganz villes méi. All eis Gruppe sichen zu jidder Zäit jonk Leit déi interesséiert si, fir an hirem Komitee matzeschaffen! Bass de virwëtzeg? Klick bei äis eran a mell dech esou séier, wéi méiglech.
Mier sinn e chrëschtleche Mouvement di ënnert dem Motto « lëschteg a kritesch - an der eegener Responsabilitéit - chrëschtlech » Aktivitéiten ubidden di vu Jonken organiséiert ginn : Weekender, Versammlungen an souguer eng Kolonie an Däitschland. Mier schaffen zanter 26 Joer mat bénévole Jugendlechen an hun permanent eng ronn 15 Stéck di aktiv bei ons sinn. Mier siche Jonker di interesséiert sinn ons Gruppen ze encadréieren an duerfir kritt dir och speziell Formatiounen ugebueden : Aide-animateur (Brevet B), animateur (Brevet C) esou wie verschidden thematesch Weekender an ons Kolonie an Däitschland. Encadréiert gëss du bei eis vun engem assistant pastoral an enger Pädagogin.
D'Jeunesse Européenne Luxembourg ass de Jugendgrupp vun dem Mouvement Européen au Luxembourg. Mier hunn zanter onser Grënnung viru méi wie 20 Joer nach ëmmer op benevoler Basis geschafft. Am Ament sinn eng Dozen Jugendlecher bei eis aktiv a schaffe mat dru fir Europa de Jugendleche vu Lëtzebuerg méi no ze bréngen. Dobäi ass all Iddi wëllkomm, mer plangen an organiséieren eng ganz Rëtsch Projeten am Laf vum Joer a freeën eis fir all Ënnerstëtzung.
Et besteet och d'Méiglechkeet fir un europäesche Formatiounen an internationalen Aktivitéiten deelzehuelen.
Europa ass wichteg an Europa ass och deng Zukunft.
Bekannt ënnert dem Numm « Duke of Edinburgh’s Award » besteet d’Fondatioun Mérite Jeunesse zënter 1993 hei zu Lëtzebuerg a kënnt ursprénglech aus England. Mir bidden all Jonken tëschent 14 an 25 Joer een Programm un, deen individuell op jiddereen ugepasst, et hinnen erméiglecht fir villsäitëg aktiv ze sinn, sech ze engagéieren, an nei Experienzen ze maachen.
Sidd Dir interesséiert?
De Programm vum Mérite Jeunesse ass agedeelt an 3 Niveauën :
Bronze, Sëlwer a Gold an fir all Niveau sollt Dir a folgend 4 Beraïcher während enger gewësser Zait aktiv sinn :
Dir kënnt Iech déi Aktivitéiten eraussichen, déi Iech Spass maachen an selbstverständlech gidd Dir och vun erfahrenen Tuteuren enkadréiert, déi Iech während Äerem « Mérite » begleeden.
Sidd Dir virwëtzeg ginn, dann kuckt bei ons eran!
Kulturhuef a.s.b.l., ass eng Associatioun déi sech ëm de "Musée de l'imprimerie" an de "Musée du jeu de cartes", de Kino an de Café-Theater zu Gréiwemaacher këmmert. Mir siche Fräiwëlleger an der Kees am Cinemaacher.
Aufgaben a Responsabilitéite vum Fräiwëllegen :
Verkaf vu Kinosticketen, Gedrénks a Schneekegkeeten, Ausdeele vun 3D Brëller (nëmmen fir 3D Seancen). Responsabel fir de Keessefong a fir d’Material.
Heefegkeet: min. 1x / Mount, ongeféier 40 Minutte pro Seance
mail (at) kulturhuef (dot) lu
Hues du Loscht zu den 200 Jonken ze gehéieren déi bei dem Vakanzeservice vum Roude Kräiz Lëtzebuerg aktiv sinn?
Mir siche Jonker déi motivéiert si fir sech an engem oder e puer vun dëse Beräicher z’engagéieren:
1) Animateur/-trice vun Campen a Kolonien
2) "Co-pilot" an engem Jugendhaus
3) Nohëllefscouren an enger Maison-relais
4) Den Equipen an den Haiser vum "Service Migrants et Réfugiés" hëllefen
Mir proposéieren dir eng spezifesch Formatioun fir dech op deng Aufgaben an de verschiddene Beräicher virzebereeden : Animateursbreveten, Formatioun "Co-pilot“, respektiv den Encadrement vun eiser Equipe vu Professionellen.
All Dag si Mënschen enger grousser Zuel vu Risiken ausgesat, déi hir Gesondheet a Gefor bréngen a souguer hiert Liewen oder hire Besetz bedréien. D’Leit am Rettungsdéngscht sinn do fir an sou enge Situatioune séier an effizient ze hëllefen.
Iwwer 8000 Fräiwëlleger sinn zu Lëtzebuerg fir d’Rettungsdéngschter aktiv. Si iwwerhuele wichteg Aufgaben an eiser Gesellschaft: si suergen dofir dat den Asaz vun den Rettungsdéngschter hei am Land garantéiert ass. Hier Haaptmotivatioun ass d’Nächsteléift, d’Gefill vu sozialer Verantwortung an de Wonsch sech an den Déngscht vun hire Matmënschen ze stellen.
Wann‘s Du dech an denger Fräizäit och wëlls asetze fir Leit, déi am Leed sinn an Nout leiden, ze hëllefen oder ze ënnerstëtzen, dann engagéier dech bei de Rettungsdéngschter.
Selbstverständlech kritt all Fräiwëllegen eng passend Ausbildung an déi néideg Ausrüstung, fir säin Asaz auszeféieren, seng Aufgab ze erfëllen oder déi Funktioun ze iwwerhuelen fir déi en bei eis opgeholl ginn ass, beschtméiglech kënnen auszeféieren.
Wie si mir ?
Mir- d’Lëtzebuerger Jugendkonferenz, kuerz « CGJL », sinn d’Prabbelisorganisatioun vun de Jugendorganisatiounen hei am Land. Zesumme mat enger faarweger Mëschung vun ënnerschiddleche Membersorganisatioune verschafe mir ärer Stëmm op nationalem an internationalem Niveau Gehéier.
Fir et kuerz ze maachen: Är Meenung läit eis um Häerz!!! Net fir näischt konsultéieren eis Ministèren an Institutiounen a Bezuch op jugendspezifësch Froen. Dir gesitt den Drot an di « Iewegt Etagen » ass gespaant! Lo hänkt et just nach un iech dës Geleeënheet och ze notzen.
Maach mat!!
Et ass ganz einfach. An eisen ënnerschiddleche Aktivitéite bidde mir dir nieft interessanten Themen och vill Fräiraum fir den Austausch an Diskussioun. Interessi erwächt? Da steet denger Aktioun jo näischt méi am Wee. Informéier dech iwwert eis Aktivitéiten op www.cgjl.lu oder op Facebook.
D'Grupp Young Fairtrade setzt sech mat faarwegen Aktioune fir fair Nord-Süd-Bezéiungen an. Ob mat Fairtrade Cocktailen op Festivallen oder fair gehandeltem Glühwäin a Schockela op Chrëschtmäert — d'Young Fairtrade sinn am ganze Land an esou guer iwwer d'Grenzen eraus ënnerwee, fir mat Freed an Energie d'Iddi vun enger méi gerechter Welt un d'Leit weiderzeginn. Mat hirer Fotoausstellung Face2Face maache si lokal op d'Liewensweisen an de Länner vum Süden opmierksam, mam Zil d'Ëffentlechkeet zum Nodenken iwwer eis Konsumgewunnechten ze bréngen.
Bei den Treffen, déi eemol am Mount stattfannen, gëtt a gemittlecher Atmosphär iwwer all méiglech Themen diskutéiert, Iddie gesammelt, Meenungen ausgetosch a Pläng fir zukünfteg Aktiounen a Projete gemaach.
Wann s du och Loscht hues, dech fir de Fairen Handel ze engagéieren, da mell dech bei info@fairtrade.lu oder op Facebook an der Grupp Young Fairtrade.
« Je me suis investi car je voulais améliorer l'environnement des élèves », raconte Diogo Ferreira, 21 ans, qui vient d'achever une formation d'électricien en énergie. Venu du Portugal à l'âge de cinq ans et demi, Diogo a fait sa scolarité à l'école primaire de Schifflange, avant de poursuivre ses études au lycée de Lallange puis au lycée technique d'Esch-sur-Alzette. C'est dans ce dernier établissement qu'il a pris la décision de rejoindre le comité des élèves, au sein duquel il a vite trouvé ses repères. Il a aidé à organiser des événements, se positionnant entre autres comme spécialiste de l'animation musicale.
Diogo n'a guère hésité quand le Service national de la Jeunesse a approché le comité des élèves pour proposer à ses membres de suivre une formation : « On y a appris comment travailler en groupe, comment gérer des conflits internes. Entre les participants, les amitiés sont vite apparues. » Ayant fait partie du comité des élèves pendant un an, il n'a pas voulu abandonner ses camarades à la fin de ses études secondaires et s'est décidé à donner un coup de main pendant un an supplémentaire. Même quelques années après avoir quitté l'établissement scolaire, il est encore en contact avec le comité actuel, histoire de prodiguer des conseils au président et à ses membres. « Il est difficile de maintenir la qualité dans un comité quand les élèves partent les uns après les autres », se justifie-t-il.
Question de savoir-faire
Le bénévolat est une source de motivation pour Diogo, qui anime à présent des ateliers de formation dans le cadre des activités du Centre d'information jeunes (CIJ) à Esch-sur-Alzette. « L'expérience en équipe est un bon point », fait remarquer Diogo, qui s'est aperçu que les jeunes prêts à s'investir étaient généralement des gens ouverts. Le principe qui guide sa démarche est simple : « Si ce n'est pas toi qui change le monde, ce sera qui ? » Dans le cadre du CIJ, il met à profit l'expérience qu'il a glanée en prenant contact avec les comités des élèves pour leur proposer des séances d'information.
« On dit que les plus jeunes n'ont pas de volonté mais ce n'est pas vrai. Ils ne savent pas comment s'y prendre parce qu'ils n'ont pas le savoir-faire. » Diogo est d'avis qu'il faut les prendre en main et une fois qu'ils ont pris de l'assurance, ils deviennent plus autonomes. Discuter, chercher des solutions ensemble : la dynamique de groupe est au coeur du bénévolat, car à force de donner, on reçoit aussi en retour.
De Patrick Azevedo engagéiert sech zanter hien néng Joer huet bei de Scouten an der FNEL (Fédération nationale des éclaireurs et éclaireuses du Luxembourg). En Engagement dat hie konsequent duerchzitt, vu dat hie mat siechzéng Joer Chef bei de Scoute gouf a viru Kuerzem seng Formatioun an der FNEL ofgeschloss huet. De Patrick zéckt net fir dëser fräiwëlleger Aktivitéit vill Zäit ze widmen; hie këmmert sech all Samschden ëm e Grupp Kanner am Alter vu siwe bis eelef Joer an hëlleft bei der Organisatioun vu Scoutscampe während dem Joer. „Dat fuerdert vill Responsabilitéit a brauch Zäit“, erkennt hien. „Mä et mécht mir vill Freed fir mat Kanner ze schaffen. Dat ass eppes Wichteges.“
De Patrick vertrëtt d’FNEL och bei der Lëtzebuerger Jugendkonferenz (CGJL -Confédération générale de la jeunesse), dem Haaptvertrieder vun de Jugendassociatiounen zu Lëtzebuerg. „Mir probéieren eis Idealer ze verteidegen“, zielt hien mat Iwwerzeegung. Dem Patrick säi fräiwëllegt Engagement hellt net domat op. Virun e puer Joer huet hien decidéiert fir sech als Kandidat fir de Schülerkomitee an sengem Lycée ze mellen. „Ech interesséiere mech fir Politik“, begrënnt hien seng Wiel. D’Schoulreform huet säin Intressi fir sech an den Déngscht vun den Schüler ze stellen natierlech nach verstäerkt. Zanter dräi Joer ass den Patrick och Member vun der Nationaler Schülerkonferenz (CNEL- Conférence nationale des élèves luxembourgeois), eng Plattform fir Austausch an berodend Organ dat all d’Lycéesschüler beim Educatiounsministère vertrëtt. Hien vertrëtt esouguer d’CNEL am Conseil supérieur de l’éducation an am Conseil supérieur de la jeunesse.
Erfahrung gewannen
„Ech fannen et interessant sech kënnen ëm en Dësch ze setzen an iwwert en Thema ze diskutéieren“, erklärt hien. Sou huet hie geléiert Rapporten oder Dossieren ze schreiwen an an Emailen ze argumentéieren. Dëse Genre vun Aarbecht, „dee léiert een net an der Schoul“, gëtt hien ze bedenken. Senger Meenung no ass de Benevolat wichteg an eiser Gesellschaft : « Et ass wouer dat fräiwëlleg Aarbecht engem et net erlaabt fir sech eppes z’iessen oder en Auto ze kafen, mä et hannerléisst een eng besser Spur um Enn vu sengem Liewen anstatt sech domat zefridden ze gi fir Offall ze produzéieren. » De Patrick wëllt e Beruff am pädagogeschen oder am edukative Beräich behalen, mä schléisst et net aus sech enges Daags an enger politescher Partei oder enger Gewerkschaft anzeschreiwen. An Tëschenzäit, mécht hien mat sengem fräiwëllegen Engagement weider an ass sech bewosst dat hien op des Aart a Weis wäertvoll Erfahrung gewënnt.
„Et gi Leit, déi soen dat e fräiwëllegt Engagement verlueren Zäit ass. Ech sinn net där Meenung. Et ass derwäert fir e bësse vu senger Zäit ze investéieren. All klenge Steen erméiglecht et, d’Haus ze bauen.“ De Flavio Santos Pachi, zwanzeg Joer, weess vu wat hie schwätzt. Zu Lëtzebuerg vu kapverdianeschen Eltere gebuer, ass hie bis zur Septième am Grand-Duché an der Schoul gaang, iert hien an d’Belsch weidergemaach huet. Seng Schwëster ass Member am Comité Spencer – enger Associatioun déi sech besonnesch fir Projeten asetzt déi d’Integratioun vu jonke Leit mat kapverdianeschem Ursprong förderen.
De Flavio hat schonn eng kleng Ahnung wat hie géing erwaarde wéi hien déi éischte Kéier op eng Versammlung gaangen ass, aus Virwëtz. Hie kënnt séier an déi ganz Saach eran an hëlt un e puer Aktivitéiten deel, bis hie schliisslech virun zwee Joer Member vun der Associatioun gëtt. „Ech hu mech bei e puer Projeten engagéiert an zanter deem kann ech net méi ophalen“, stellt hie mat enger Grëtz Zefriddenheet fest. Säin Engagement hëlt him e puer Stonnen d’Woch an heiansdo och en Deel vum Weekend, mä hie mécht dat mat ëmsou méi Freed well „ech wéisst net wat ech soss mat menger Zäit géing maachen“.
Méi Responsabilitéit
Zanter Mäerz 2011 ass hie souguer Vize-President vun der Associatioun. „Dat erlaabt mir et fir en Iwwerbléck ze hunn an all d’Aspekter vum Comité kennenzeléiren“, seet hien. „Am Ufank wollt ech just hëllefen. Den Déclic ass réischt duerno komm.“ De Feedback deen hie kritt, mécht Courage: een deen der Associatioun Merci seet fir hier wäertvoll Hëllef, een aneren deen sech freet ze gesinn dat jonk Leit sech fir e gudden Zweck engagéieren.
De Flavio ass och Deel vun enger klenger Equipe déi sech ëm den Internetsite këmmert : dëse Site informéiert driwwer wat zu Lëtzebuerg an um Cap Vert geschitt. „Déi zwou fräiwëlleg Aktivitéiten iwwerschneide sech“, erklärt hien. Hien dréit besonnesch zu der Illustratioun vum Site bäi andeems hie selwer Fotoe mécht. Mat dem Ziel fir Sportsproff ze ginn, huet de Flavio verstan dat de Benevolat him géing vill bréngen: „Et léiert ee Situatiounen an d’Behuele vun de Leit z'analyséieren. Et ass eng gutt Erfahrung fir sech spéiderhin an der Aarbechtswelt z'integréieren, besonnesch wann een sech d’Richtung vum soziale Secteur wëllt orientéieren.“
Ursprénglech aus dem Cap-Vert, huet d’Lauridania Pires seng Famill wéi hatt nach kleng war op Lëtzebuerg begleet. Hatt huet hei e groussen Deel vu senger Schoulzäit hannert sech bruecht, iert et weider an d’Belge gaangen ass. Dat hatt am Benevolat aktiv ass, war e bëssen Zoufall. Besonnesch well hatt schonn eng éischt Erfahrung bei de Scoute gemaach hat, wou hatt no engem Joer festgestallt huet, dat et him do net wierklech géing gefalen. „Ech war éischter introvertéiert“, bemierkt hatt.
Am Joer 2009 huet de Sekretär vum Comité Spencer him proposéiert fir sech dëser Associatioun unzeschléissen, déi sech ëm Projeten déi an enker Relatioun sti mat de Kapverdianer, déi zu Lëtzebuerg wunnen. Hien huet him virgeschloe fir e puer Méint laang bei hiren Aktivitéite matzemaache fir sech dat unzekucken. „Ech hätt net geduecht dat ech géing Member ginn“ am Comité Spencer, erklärt d’Lauridania, wat séier Gefalen dorunner fënnt. Hatt huet Loscht fir „eppes Konkretes ze maachen“ an d’Associatioun gëtt him d’Geleeënheet dofir. Seng Motivatioun ass ëmsou méi grouss well de Comité Spencer e Lien mat senger Heemecht huet a ganz aktiv am soziale Beräich ass.
Duerch säin Asaz ass hatt der Presidentin opgefall, déi him proposéiert huet fir dem Verwaltungsrot bäizetrieden. „Ech hu mer gesot: firwat net?“, erzielt hatt. Vum einfache Member kënnt hatt esou zum Poste vum Keessier. Dëst ass e Poste mat Responsabilitéit deen him gutt gefält, genausou wéi d’Convivialitéit am Grupp: „Ech hu mech deenen anere géigeniwwer méi oppe gemaach, dat huet mir gehollef e bëssen aus mengem Schleekenhaus erauszekommen.“
Sech en Zil ginn
Fir hatt heescht Benevole ze sinn „sech wierklech z’engagéieren a responsabel ze sinn“. Hatt moosst den Notze vum Benevolat andeems hatt d’Aktivitéit vun enger Associatioun mat enger „mini-entreprise“ vergläicht, ouni dat ee muss seng perséinlech Finanzen abréngen. „Fir e Benevolat ze maachen, muss ee mam Häerz drun erugoen“, seet hatt. Hatt ënnersträicht wéi wichteg et ass sech aus dem perséinleche Kontext erauszezéien: „Et muss een sech en Zil ginn andeems een sech seet, dat een et net nëmme fir sech mécht, mä och fir déi aner.“ Dat ass net ëmmer evident, an enger Zäit an där déi jonk Leit sech net méi souvill engagéiere wéi virdrun, an sech léiwer amuséieren. Lo ass et awer sou dat „an enger Associatioun sinn, och sech amuséieren ass, mä op eng aner Aart a Weis“. Dësen Engagement „mat Häerz“ ass eng Virbedéngung fir als Fräiwëllegen Erfolleg ze hunn. „Et soll een net forcéieren, mä Loscht drop hunn“, schléisst hat dorausser.
Am Joer 2006 ass ee Kolleg bei de Steven Lemonache komm an huet hie gefrot ob en net wéilt mat him eng Formatioun fir Animateur vu Vakanzekolonië maachen. De Steven, deen dee Moment am Lycée ass, weess dat säi Kolleg scho bei Kolonië vum Roude Kräiz matgemaach huet, mä hie selwer huet dat nach ni probéiert. Am Alter vu fofzéng Joer decidéiert hien also fir mat sengem Kolleg dohin ze goen. Hie sollt et net bereien. „Et war zimlech relax“, erënnert hie sech. D’Joer duerno mécht hie bei enger éischter Kolonie mat ; hie geet mat engem Grupp Kanner mat op Fiesch an der wallisecher Schwäiz. „Et huet mech beandrockt ze gesinn dat ee Kanner kéint glécklech maachen ouni Playstation ze spillen“, gëtt hien zou.
Dës gelongen Erfahrung huet hie motivéiert fir seng Formatioun fäerdeg ze maachen, déi an zwee Cyclen ofleeft : deen éischte fir Hëllefsanimateur ze ginn, an deen zweete fir zum eegestännegen Animateur ausgebilt ze ginn. De Steven war dunn e puer Mol bei Vakanzekolonien derbäi, op dat zu La Panne an der Belsch, oder erëm zu Fiesch war. „Ech hunn bekannte Gesiichter erëmgesinn, mä et waren och Kanner déi ech fir d’éischte Kéier gesinn hunn“, erzielt hien. Spéiderhin huet hien der e puer vun hinnen an der Strooss begéint oder am Lycée an deem hien am Moment ass: wann déi meescht och grouss gi sinn, déi gutt Momenter déi een zesummen hat, maachen dës Treffe sympathesch.
De Sënn fir Responsabilitéit
Zwou Woche mat Kanner ze verbréngen déi ee knapps kennt ass kee Problem, erklärt hien. Am Géigesaz, wann een zeréckkënnt, deet et engem heiansdo fuerchtbar leed dat een sech muss trennen. „Am Ufank, wollt ech just mat mengem Kolleg matgoen“, erënnert de Steven sech. „No der éischter Kolonie hat ech esou vill geléiert, dat ech Loscht hat fir weiderzemaachen.“ Zanter deem huet hien e puer nëtzlech Saache geléiert: „Et muss een de Courage hunn fir op anerer zouzegoen. Ausserdeem léiert ee Responsabilitéit ze iwwerhuelen an tëschent de spaassegen an de serieuxe Momenter ze ënnerscheeden.”
Een anere Virdeel ass d’Gruppenerfahrung, dat ee léiert e Grupp ze ginn. « Wann e Grupp gutt ass, da schéngt d’Zäit an der Kolonie ze kuerz », bemierkt de Steven. Hien ass iwwerzeegt dat esou eng Erfahrung als Fräiwëllegen him spéiderhi kann nëtzlech sinn, besonnesch op der Aarbechtsplaz. Ze léieren e Sënn fir Responsabilitéit ze hunn wann ee jonk ass, während een sech amuséiert, ass eng gutt Saach, mengt hien. „Dës Erfahrung huet mäi Liewe verännert, op eng positiv Manéier. An an dëser Zäit gëtt een och net derzou verféiert fir aner Dommheeten ze maachen“, fügt hie mat engem Schmunzele bäi.
Mat 18 Joer ass d’Lisa Helminger am Gaang säi lescht Joer am Lycée Robert Schuman fäerdeg ze maachen. Dës dynamesch jonk Fra ass un de Benevolat gewinnt; d'Lisa huet sech vu klengem un an der Scoutebewegung engagéiert. „Ech si lo schonn eelef Joer bei de Scouten“, seet hatt, „an zanter véier Joer sinn ech Cheftaine.“ D’Welt vun de lëtzebuerger Scoute kennt hatt effektiv gutt: hatt huet schonn als klengt Kand säi Papp, dee Gruppechef zu Jonglënster war, dohinner begleet. Säi Brudder ass de Spueren vu sengem Papp gefollegt, do huet et dem Lisa natierlech geschéngt fir och dëse Wee ze wielen.
Sech am Benevolat z’engagéieren heescht e bëssen (oder vill) vu senger Fräizäit zu opfere fir sech ëm anerer ze këmmeren. Eng Kéier d’Woch geet d’Lisa op eng Reunioun fir mat anere Scoutecheffen iwwer Organisatiounsfroen ze diskutéieren an zwou Stonnen d’Woch ass hatt fir Animatioun am eigentleche Sënn zoustänneg. Um Enn vum Schouljoer verlaangt de Summercamp och vill Virbereedungsaarbecht, mä d’Lisa këmmert sech mat vill Begeeschterung drëm. „Ech denken dat de Benevolat eppes bréngt. E gëtt engem d’Gefill dat een sech fir aner Leit asetzt, an déi ginn eppes zeréck. Dëst Engagement mécht eis méi staark a gëtt eis Selbstsécherheet.“ Chef vun engem Grupp ze sinn ass effektiv eng grouss Responsabilitéit: „Et léiert een och virun engem Grupp ze schwätzen. Vun do un hat ech ni méi Angscht fir an der Schoul en Exposé virun der Klass ze halen.“
Sech organiséieren a coordonnéieren
Nieft der perséinlecher Beräicherung, bréngt d’Scoutebeweegung him och Kontakter baussent de Grenze vum Land. Dëst Joer gouf et een internationale Camp a Schweden, wou „jonk Leit aus der ganzer Welt sech getraff hunn a Wäerter deelen“. Wann ee Scout gëtt, da bleift een et ëmmer, mengt d’Lisa. Dëse Sënn fir den Engagement dierft och seng Zukunft bestëmmen: hatt denkt drun fir e Studium fir Assistante sociale ze maachen, e Beruff an deem een sech och an den Déngscht vun deenen aner stellt. Hatt dreemt ausserdeem dervu fir ee Joer an de Senegal ze goe fir e Volontariat ze maachen am Kader vun engem Projet dee vun de LGS finanzéiert gëtt. D’Onsécherheet déi mat esou engem Deplacement verbonnen ass gëtt domat kompenséiert dat een zu der Scoutefamill gehéiert, dat een sech „ewéi doheem“ fillt.
Een anere wichtege Wäert deen d’Benevolat vermëttelt, ass d’Noutwendegkeet fir sech z'organiséieren, fir sécherzegoen dat d’Koordinatioun vun den Aktivitéite klappt, besonnesch wann een sech ëm Kanner këmmert. Ausserdeem, muss de Benevolat, dem Lisa no, selbstlos bleiwen. Vun deem Moment u wou en an der Form vu Suen entschiedegt gëtt, ass et net méi dat selwecht: „Et ginn aner Weeër fir en ervirzesträichen, zum Beispill an engem CV oder andeems een en Diplom kritt.“
Wéi vill aner Jonker a sengem Alter, weess d’Maysan Qasem, 17 Joer, nach net sécher wat hatt spéiderhi wëll maachen. Hatt huet awer och nach zwee Joer Zäit, iert et mat der Schoul, am Athénée vu Lëtzebuerg, fäerdeg ass. Vläicht ass et säin Interessi un der Medezin deen hatt zu engem Benevolat bei der Protection civile geféiert huet: „Ech wollt schonn ëmmer de Leit hëllefen. An wat Éischt Hëllef ugeet, ass et eng gutt Erfahrung, eng Erfahrung fir d’Liewen.“
Den Ausléiser fir sech z'engagéiere war en Éischt Hëllefs Cour deen d’Schüler vu senger Klass gemaach hunn. Well hatt zu Stengefort wunnt, huet d’Maysan mat zwou Frëndinnen decidéiert sech bei der lokaler Protection civile als Fräiwëllegen ze mellen. „Ech hunn do Leit kannt“, erklärt hatt, dofir war dee Schrëtt net esou schwéier. Hatt mécht do e puer Formatiounscouren, a kritt doropshi gréng Luucht fir als drëtte Sanitäter an enger Ambulanz matzefueren. Op dës Aart a Weis péckt hatt eng Hand un beim Krankentransport oder beim Versuerge mat Éischter Hëllef. „Et huet mir gutt gefall“, bemierkt hatt, „mä well ech och aner Prioritéiten hat, sou wéi d’Schoul an d’Musek, hunn ech decidéiert fir no engem Joer opzehalen.“
Sech nëtzlech maachen
Am Moment, huet hatt sech enger Aktioun vun der Caritas ugeschloss, zu Gonschte vun engem Projet fir de Bau vun enger Schoul am Burkina Faso. Dës Formule seet him méi zou, well hatt seng Zäit besser andeele kann; hatt kann sech sou zäitweis engagéieren ouni stänneg musse präsent ze sinn oder seng aner Aktivitéiten ze vernoléissegen. Nodeems hatt zesumme mat véier anere Schüler un enger Pressekonferenz deelgeholl huet fir de Public ze sensibiliséieren, plangt hatt och eng Hand matunzepake beim Verkaf vun T-Shirten; de Benefice dovu kënnt dësem Projet an Afrika zu gutt.
Well de Benevolat him gefält, schléisst hatt et net aus fir sech och an aneren Organisatiounen ze engagéieren. Fir hatt heescht Benevole sinn eppes Nëtzleches ze vollbréngen, ee Gefill dat him eng grouss Satisfaktioun gëtt. Zu der Fro op et gutt wier, fir déi geleeschten Aarbecht ze bezuelen, äntwert d’Maysan éischter negativ: „Dat motivéiert déi, déi sech schonn zwanzeg Joer laang engagéieren, net zousätzlech.“ Hatt schätzt dat déi, déi wëllen hëllefen, et net fir d’Suen maachen: „Et ass ee frou fir kënnen eppes vollbruecht ze hunn, fir engem, deen et brauch, kënnen ze hëllefen.“
D’Freed fir aneren ze hëllefen
Mat sengen 31 Joer, féiert d’Mandy Fautsch e gutt gefëllten Liewen. Nieft sengem Beruff als Agent fir lokal Entwécklung an engem Reseau fir Solidarwirtschaft, setzt hatt sech voll a ganz fir fräiwëlleg Aktivitéiten an. „Am Groussen a Ganze kommen ech op véierzeg bis fofzeg Stonnen Benevolat d’Woch“, erzielt hatt gläichgülteg. Ouni Zweiwel: säin Engagement spigelt seng Liewensphilosophie erëm. Während senger Kandheet, huet hatt schonn de gréissten Deel vu senger Fräizäit bei de Scouten verbruecht. Duerno huet hatt sech beim Jugendhaus zu Wolz engagéiert wéi dat d’Dieren opgemaach huet. D’Mandy huet net gezéckt fir d’Formatioun vum Service National de la Jeunesse (SNJ) fir Aide-Animatrice an duerno Animatrice ze maachen.“Dës Formatioun war och nëtzlech fir meng Aarbecht bei den Scouten“, präziséiert hatt. Ausserdeem, um méi sportleche Plang, huet hatt Fussball an der Damenequipe zu Wëntger gespillt.
A wéi wann dat nach net genuch wier, engagéiert d’Mandy sech och nach an der Protection civile, am Ambulanzendéngscht. „Ech hunn dunn missten Entscheedungen treffen a Prioritéite setzen“, gëtt hatt zou, an huet aus Mangel un Zäit seng Aktivitéite bei de Scouten an am Jugendhaus missten opginn. Säin Zäitplang ass trotzdem nach ëmmer gutt ausgelaascht: Mat senge Course fir d’Protection civile, de Permanencen déi hatt am Ambulanzen- oder am Rettungsdéngscht iwwerhëlt an den Übungen déi hatt fir déi jonk Pompjeeën hält, ass seng Woch ëmmer gutt gefëllt.
Op Zack
„Ech si frou fir anere Leit kënnen ze hëllefen ouni dofir e spezielle Merci ze erwaarden“, erklärt hatt. Als Fräiwëllege bei der Protection civile, gesäit een es vun allen Zorten. D’Mandy gëtt zou dat et net ëmmer agreabel ass fir komplett bedronk Leit an d’Clinique ze begleeden, zemools wann et iwwert eng länger Distanz ass. Bei den Hëllefsaktiounen, behuele munnech Leit sech aggressiv während anerer de Secouristen eng Dankbarkeet ouni Grenzen erweisen. „Bei de Pompjeeën si mir wéi eng grouss Famill », observéiert d’Mandy, well et muss een net nëmmen ëmmer zur Verfügung stoen, mä och mam Vertraue vun de Kollege rechne fir deene schwieregste Situatioune Meeschter ze ginn.
Doduerch datt hatt ëmmer méi Erfahrung gewënnt, kritt d’Mandy ëmmer méi Responsabilitéit. Um Punkt fir Responsabel vun de Jonke Pompjeeën am Kanton Wolz ze sinn, ass hatt och nach stellvertriedende Chef vum Humanitarian Intervention Team Luxembourg, en Interventiounsgrupp deen sech ëm humanitär Missioune baussent dem Grand-Duché këmmert a mat deem D’Mandy 2010 zu Haiti war nodeems d’Land vun deem schrecklechen Äerdbiewe betraff war.
Dës Projete leie mir um Häerz
"Et war 2009 : ech wollt méi iwwert de Fonctionnement vum System vum fairen Handel gewuer ginn a wéi ech am Internet gesicht hunn, hunn ech gesinn datt et e Grupp géing ginn deen TransFair Jeunes heescht. Ech hu mech do ugeschloss a säit deem hëllefen ech Aktivitéiten ze organiséieren sou wéi Cocktailen op der Basis vu fair gehandelte Produiten ze preparéieren, Stänn bei Museksmanifestatiounen ze hunn oder eng Fotosausstellung op d’Been ze stellen.“ Et war effektiv op des Aart a Weis dat de Georges Lemmer, dee just mam Lycée fäerdeg war an sech drop virbereet huet op d’Uni ze goen, decidéiert huet sech an engem Secteur z'engagéieren dee, wéi et him geschéngt huet, seng Ënnerstëtzung verdéngt hat.
Dat selwecht Joer huet eng Informatiounssëtzung an der Schoul zu der Aidsproblematik dem Georges säin Interessi ervir geruff an hien huet decidéiert d’Associatioun Aidsberodung ze kontaktéieren an der hien sech lues a lues méi abruecht huet. Hien huet ugefaang eng Soirée am Kader vum Weltaidsdag ze organiséieren an sech dunn an der Präventiounsaarbecht engagéiert (Ausdeele vu Brochuren oder Kondomer, Opriichte vun Stänn) an an der Begleedung vun HIV positive Leit (Hëllef beim Akafen oder Deelhuelen un Fräizäitaktivitéiten). Am Moment – während hien mat 22 Joer am gaang ass säi Bachelor an der Psychologie fäerdeg ze maachen - , hëlt hien sech weiderhin zwou bis dräi Stonnen an der Woch Zäit fir mat där nämmlechter Begeeschterung sengen zwou fräiwëllege Beschäftegungen nozekommen.
Eng aner Manéier fir sech z'engagéieren
"Ech denken datt et wichteg ass fir mat dëse Projete weider ze fuere well si mir um Häerz leien“, erzielt de Georges. „Si erlabe mir et frëndschaftlech Bezéiungen oprecht ze erhalen a sinn a feste Bestanddeel vu mengem Agenda.“ Dat hien sech mat souvill Ausdauer engagéiert, leit dorun dat hien d’Gefill huet nëtzlech ze sinn. Wat d'Essenz vun der fräiwëlleger Hëllef ugeet, hëlt hien un dat d’Benevolat schonn ëmmer existéiert huet et och weiderhi wäert existéieren, mä dat d’Motivatioun vun deene Jonken sech geännert huet: „Am Géigesaz zu hiren Elteren, déi sech éischter op méi laang Zäit an enger Associatioun engagéiert hunn, zéien déi Jonk et vir fir zwee bis dräi Joer aktiv ze sinn iert si sech engem anere gudden Zweck zouwennen. Hier Ënnerstëtzung ass méi punktuell.“
Dës Spontanitéit spigelt e bëssen dat aktuellt Liewen rëm dat méi séier weidergeet wéi virdrun. „Déi Jonk hunn vill Ideeën an vill Elan, sou dat et ze vill Projete ginn un deenen si wéilten deelhuelen", bedenkt de Georges. Senger Meenung no, géing et net vill ännere wann déi Jonk mat guddem Wëlle fir hier fräiwëlleg Aktivitéite géinge bezuelt ginn: „Wann si géife bezuelt ginn, géingen si sech dofir awer net méi engagéieren." Well de Benevolat eng Erfarung ass déi et sech lount z'erliewen, onofhängeg vun all finanzieller Ureegung.
Op deen aneren duer goen
Momentan a sengem läschte Joer Lycée, plangt d'Julie Weicker, 18 Joer, fir seng Studien d'nächst Joer op der Uni virunzefueren. Während de Premièresexamen ëmmer méi no kënnt, ass säi Programm fir déi nächst Méint scho geplangt a gutt gefëllt. Trotzdem fënnt d’Julie nach Zäit fir sech fräiwëlleg bei de Scouten anzesetzen. Dat ass ee Beräich deen hatt gutt kennt, well hatt schonn zanter dem Ufank vun der Primärschoul derzou gehéiert. Hatt huet do Frënn fonnt, seng beschte Frëndin mat deem hatt nach ëmmer vill verbënnt ageschloss.
Duerch d’Benevolat huet hatt och aner Horizonter entdeckt : « Ech hu geléiert méi onofhängeg ze schaffen. Ech hunn do och fonnt wat een am Liewe brauch fir aneren ze hëllefen.“ Dësen duebelen Aspekt – d’Iwwerhuele vu Responsabilitéit an d’Freed déi esou eng Aktivitéit mécht – resuméiere gutt wéi d’Julie säin Engagement gesäit. Virun zwee Joer ass hatt Chef bei de Scoute ginn a këmmert sech zanter deem ëm e Grupp vu siechzéng jonke Leit am Alter vu véierzéng bis siwwenzéng Joer. Dat éischt Joer mat der neier Aufgab war schwéier, erënnert hatt sech, well hatt vun haut op muer Chef vun engem Grupp war an deem hat sech virdrun amuséiert huet. Vun do un huet hatt och misste wësse wéi een eng Equipe dirigéiert, also och wéi een sech Respekt verschaaft. „Ech hu missten op d’Zänn bäisse mä et huet mir och vill Freed gemaach“, gëtt hatt zou, „am Moment sinn ech ganz zefridden.“
Eng gutt Erfahrung
Hatt dirigéiert weiderhi säi Grupp an deem och säi Brudder an seng Schwëster an hir Frënn sinn. An et funktionéiert well jiddereen den Ënnerscheed mécht tëscht dem Familljeliewen an de Scouten, wou d’Bezéiungen op eng aner Aart a Weis funktionéieren. Dëst Joer fiert säi Grupp an d’Schwäiz, en Abenteuer dat d’Julie net onmoosseg ze beonrouege schéngt. Et muss een dozou soen dat hatt scho bei Kolonie vun der Union Grand-Duc Adolphe (UGDA) matgemaach huet, bei deenen hatt och eng Hand ugepaakt huet. D’Erfahrung war do allerdéngs anescht ewéi bei de Scouten: hatt huet sech missen ëm eng fofzeg Kanner këmmeren déi hatt net kannt huet an déi aus ganz verschiddenen Altersklassen waren. „Di Klengst hate sechs Joer während der e puer méi al ware wéi ech“, erënnert hatt sech.
D’Julie erënnert sech och un eng fräiwëlleg Aktioun am Beräich vum Handicap, eng Erfahrung déi hatt geprägt huet: „Et ass gutt fir op deen aneren zou ze goen. Fir mech, ass d’Benevolat och dat.“ Wann et drëm geet fir de Bilan ze maachen, zéckt hatt net eng Sekonn: “Et ass ëmmer eng schéin Erfahrung, egal a wéi engem Beräich een sech engagéiert. Andeems een sech nëtzlech mécht, mécht een sech net nëmme selwer glécklech, mä et dréit een och zum Gléck vun deenen anere bäi.”
Eng Manéier fir sech z'engagéieren
Et ass virun ongeféier dräi Joer geschitt: während hatt op 5ième am Athénée war, huet d’Susi Loewen sech vun engem Projet fir humanitär Hëllef an Südafrika ugeschwat gefillt: «Warmth » (War against Malnutrition, Tuberculosis and Hunger), e Projet dee vu senger Franséischproff - dem Marie-Paule Georges, an Tëschenzäit verstuerwen – staark gefördert gouf. D’Schoul hat dofir eng Associatioun ouni gewënnbréngenden Zweck (ASBL) gegrënnt, iwwert déi mëttlerweil all dem Lycée seng Projete fir Entwécklungshëllef lafen. Begeeschtert vun dëser Idee, huet d’Susi gehollef Ouschtereeër ze verkafen, de Benefice war geduecht fir dëse Projet ze finanzéieren. Dës Aktioun huet eng uerdentlech Zomm zesummebruecht an him Loscht gemaach fir sech weider fir e gudden Zweck ze engagéieren.
D’Geleeënheet dozou huet sech d’lescht Joer gebueden, wéi hatt un enger Presentatioun iwwert d’Aktivitéite vu Young Caritas deelgeholl huet. « Ech war faszinéiert vun der Tatsaach dat ee konnt Kanner hëllefen, déi manner gutt situéiert sinn, zemools zu Lëtzebuerg“, observéiert hatt. Hatt huet esou un verschiddene Projeten deelgeholl ëm déi d’Associatioun sech gekëmmert huet, andeems et eng Hand ugepaakt huet fir eng Rei Aktivitéite fir Kanner z'organiséieren. Dës Erfarung hat hatt iwwerzeegt, hatt huet weidergemaach an op eegen Initiativ hin decidéiert fir dräi Wochen an engem Altersheem ze verbrénge wou et sech dës Kéier ëm eeler Leit gekëmmert huet.
Sozial a politesch engagéiert
„Dës Erfahrungen hu mech méi oppen gemaach“, stellt hatt am Réckbléck fest. Andeems hatt Zäit mat dëse Leit verbruecht huet, hat d’Susi d’Geleeënheet fir hir Situatioun ze deelen an ze verstoen. Et huet him richteg Freed gemaach fir Leit ze hëllefen deenen hir Situatioun net ëmmer beneidenswäert ass. “Ech hu verstan wéi wichteg d’Ënnerstëtzung ass déi een deene kann entgéint bréngen, déi keng Unhaltspunkte méi an hirem Liewen hunn“, präziséiert hatt.
Dem Susi senger Meenung no kann een di Jonk net zum Benevolat zwéngen; wann si dëse Wee wëlle goen, mussen si et aus Iwwerzeegung maachen. Vill Jonker hunn allerdéngs verstanen dat si dorausser kënne Virdeeler zéien, well, seet hatt, de Benevolat eng Manéier ass fir sech z’engagéieren a mat zwee Féiss um Buedem ze bleiwen. Zanter zwee Joer ass d’Susi och am lëtzebuerger Jugendparlament aktiv. Hatt ass sengem Brudder op dëse Wee gefollegt, an hatt ass esouguer an den Exekutiv-Bureau gewielt ginn. Dat erlaabt him fir vu méi no ze gesi wéi d’Riederwierk vun der Politik fonctionnéiert a gegebenefalls, seng Meenung zu wichtegen Theme vun der Gesellschaft ze ginn, sou wéi d’Schoul- oder d’Pensiounsreform.
Ouni de Benevolat, géingen et d'Veräiner net méi ginn
No sengem Lycéesofschloss studéiert d'Line Didelot, 19 Joer, am Moment zu Walfer Sciences sociales et éducatives. Säin Ziel ass et, fir Assistante sociale ze ginn, well hatt wëllt an engem Secteur schaffen an dem de mënschleche Kontakt am Mëttelpunkt steet. "Ech gesi mech net während véierzeg Joer déi selwecht Aarbecht op engem Bureau maachen", gëtt hatt ze bedenken.
De Kontakt mat Leit stellt en wesentlechen Aspekt a sengem zukënftegen Aarbechtsliewen duer, mee hatt huet awer och schonn en Abléck doranner kritt duerch säi fräiwëllegt Engagement am Mierscher Handballsveräin. Hatt spillt do vu Klengem un, an d'Ausübe vu sengem Lieblingssport huet hatt méi no un d'Liewen an un de Fonctionnement vum Club eru bruecht. Dëst Joer ass hatt esouguer an de Comité agetrueden; dat erméiglecht him et fir bei der Organisatioun vu Manifestatiounen ze hëllefen, mee och fir e Wuert matzeschwätze bei den Decisiounen déi un der Spëtzt vum Veräin geholl ginn. "Ech hat Loscht fir mech méi anzebréngen, erzielt hatt, als Spillerin war ech net ëmmer averstan mat den Entscheedungen déi getraff goufen."
Et ass schwéier fir Leit ze motivéiren
Sech beim Club anzebréngen heescht fir d'Line och zu der Entwécklung vum Sport bäizedroen. Ëmsou méi well de lëtzebuerger Sport op Fräiwëlleger ugewisen ass fir ze fonctionnéieren. "Ouni de Benevolat, géingen et vill Veräiner net méi ginn.", seet hatt. Während d'Traineren an d'Arbitere bezuelt gi fir hiren Asaatz, engagéieren déi aner Leit sech meeschtens op eng selbstlos Aart a Weis. "Mee et gesäit een ëmmer déiselwecht Leit um Schaffen", präziséiert d'Line. "Ouni sie hätten d'Veräiner net déi nämlecht Präsenz." De Bénévolat ass also onverzichtbar, mä e geréit heiansdo un seng Limitten: et ass net ëmmer einfach fir een Offiziellen ze fannen - deem seng Präsenz bei all Match verlaangt ass - oder ee Fräiwëllegen deen sech an de Pausen ëm d'Buvette këmmert.
D'Line mengt trotzdem dat "wann een sech engagéiert, mëscht een et net fir näischt, mä fir de Club, fir di aner Leit, oder souguer fir den eegenen Interessi." Senger Meenung no, "interesséiert de Sport d'Leit, et ass eppes Wichteges fir sie." D'fräiwëllegt Engagement a sengem Veräin zu Miersch ass bei der Famill Didelot eng Familljesaach, well säi Papp an seng zwee Bridder och do aktiv sinn
